السفر والطول بسوى الهول

مسدار السفر
للشاعر الشيخ عبد الله الشيخ

سفراً مهما يقسابنا ومسافتو تطول
ومهما يزيد عذابنا إنشاء الله سنة للحول
نهم بس في وصالك وحال لسانا يقول
سمحة الريدة للزول البريد الزول

سفراً للعيون القلبي ما بريد غيرها
بستعجلو ياهلنا وبهمل الديرة
بكرة نتوج الريدة وده أصلوا مصيرها
عارف الريد بزيد بس كان تخف دى الغيرة


سفراً مابنهم طولوا ومسافة دربوا
همنا بس وصول زولاً بريح قُربوا
الحظ التعيس ياربى بدلو أقِلبوا
يعرف شوقي ليهو وكيف بعزو وأحبو


سافر قلبي قاصد ست هواهو يزُوره
يحكى أشواقو للسمحة ويجيب الصُورة
شوفتك يا أم سماح بلحيل قليبي بدُوره
وأنا هميت خلاص يا اخوانى كيف الشورة

السفرالبوصل للبريدا بريدوا
والرد البصل كم مرة بقرأ وأعيدوا
ألم الريد علىّ ياناس صعب تحديدوا
لا متين الوصول للتشفي لمسة إيدوا

يا ريل الشمال كان بى وصالنا تطالب
نهم بسراع نجيك وسفرنا يصبح واجب
وإن خايف هواي يا الزين يسيك في مقالب
وكّت إنت.. بالزمن التشوفو مناسب




سفراً نمشى كداري ونفوسنا سعيدة
بكرة انا ناوي مهما مسافتو تبقى بعيده
أمل قلبي البريد يا السمحة منك ريده
ومناي في دياركن العامرة أتحكم تأبيده


سفراً ندّم القلب ألبريده عيونك
كيف نمشيهو يا السمحة ونخاطر دونك
وحاة البينا مايتم يا فريدة كونك
سماح دى المرة يا البيجهر كونك


سفرا أجج الشوق القبيل مازينا
زاد النار على النار المولعة فينا
إتنكرت يالسمحة وقسيتى علينا
سفرك تور الهم القبيل ناسينا

سفرا زاد على قليبي البريده عذابو
كيف رضت الفراق ،وأنا قلبي ليه ما رضابو
ألفى القلوب لو إنت قاصده خرابو
ريدك يا أم سماح انا ياما بعتزابو


لا متين يا أم سماح نشكى البعاد ونقاسى
سفرك يا ما خلف في قلوبنا مآسي
ألقلبك بريدو وقلبو يعمل ناسي
شن فايدة دموعك ماشه صبحان ماسي


يا قلبي الغرام من بدري قت لك خاصمو
أبيت تسمع كلامي وقلته ناوي تقاسموا
سمعتو الليلة خبرا في الخيال ماك راسمو
دنت أيام فراقها إنشاء الله أمرك حاسمو



يا ريل وادي حلتنا السماهو مطيرة
نصّبتك على فؤادي ألبريدك أميره
متين نتهنا يا أهلنا وتقوم السيرة
متين دى ألليد يزيد فوق البنات بشيرة


صبح يا ست هواي بلدك مسافتو بعيده
زاد الشوق علىّ عاد النفس شن في أيده
يا حليله البنهواها وشديد بنريدها
قلبي ورآك أتفرتك حديده حديده



قامت ست هوانا قمر فريقنا اللامع
جمالة يوّقف الحركة ويعكس الشارع
سنين الريد معاك زى الثواني تسارع
متين ماضي الغرام يا ناس أعيشوا مضارع

أفرحي يا أم سماح ألليله دا اليوم عيدنا
بحر الحب طمح غرّق عوازل ريدنا
ضمنا الكان زمان يا السمحة مو في إيدنا
ما قتلك قبيل نصبر صبرنا بفيدنا