دوبيت ومسادير

عقيد امات قنف نطار بريق الهجعه
اشقى وكوعو بارز للرفيف والنجعه
غراد كورو اطرب من قماري السجعه
دفاق دومتو اسرف من دمعة الوجعه

عطشانين و وابل الطرفه فوقنا يهطل
من الخلا كل يوم عملنا صبح متعطل
سيد توه الصبا اللي غناه ما بنبطل
رايو معاهو يشفى المنا ولا يكتل

اربطوا الجانا ضامر لا كبد ولا كرشة
سحار الغروب جيب لي العلوق بي الورشة
نفضن المراتب وطرحن بي الفرشة
داير يبرى جرحا في القلب مو خرشة

سيت لو مقيلو بي الباكرية في الضقال
أخد لي هجسة قم فاقد السحى الما قال
اليبس سراة السرعو ماهو تقال
لطيف قامة وأدعج وأكحل الأمقال

أجمع بي شرف الحريحير طار
داني بعيد بي المصعى وجري الحرحار
علي جريعة البنوني ومسكة أب محار
لولح راسو وإتمرعف بلا السحار

مالكن شيبنا بتدورن تخربن كبرو
مالو قلبنا عودتنو ليه يقل صبرو
نسيتننا الموت والشبر في قبرو
خليتننا الاعوج نزل ما نخبرو

انا التوب العشاري الباهي زيقو
وانا الدابي ان كمن للزول بعيقو
وانا فراج الرجال وكتين يضيقو
وانا المامون علي نسوان فريقو

ماني دغور بيوت القليه بكرف ريحه
وماني الأبله البقدل علي التلقيـحه
سايم دمي لليوم الختيوتو سميحه
بازل مالي لللازم عشاه ضبيحه

جدعا في الاصل وفي الحارة مابتحاحا
الكيك اب زنود مرض القلب المع الوحاحا
فرتاقا ولي الخصيم العقرب النتاحا
وان قابل عدوهو تسكل المناحا
منذ أكثر من سنة · إبلاغ